Ҳиндистонлик дунёга машҳур актрисалардан бири Катрина Каифнинг тўй маросимидаги дастлабки фотосуратлар эълон қилинди.

Катрина Каиф тўйига тайёргарлик сабаб барча суратга олиш ишларини тўхтатган эди. У ўзидан 5 ёш кичик ҳамкасби Вики Кaушал билан турмуш қурди ва актрисанинг тўйида тушган илк суратлари намойиш этилди.

Маълумот учун, Катрина Каиф 1983 йилда Гонконгда тавваллуд топган. Ўз карьерасини 14 ёшида модель сифатида бошлаган. Кейинроқ эса рақс санъати ва хонандалик билан шуғулланган актриса «Тезлик 3», «Ноль», «Токи ҳаёт эканман», «Пойга», «Намасте, Лондон» фильмларидаги ижроси орқали дунё бўйлаб ўз мухлисларини топган. Унинг турмуш ўртоғи Вики Каушал 1988 йилда Мумбайда дунёга келган. У актёр сифатидаги фаолиятини 2012 йилда бошлаган.

Катрина Каиф Ҳиндистоннинг маҳаллий оммавий ахборот воситаларида жуда фаол актриса ҳисобланади. Шунинг учун актриса ҳар доим турли хил миш-мишлар қуршовида бўлади. У бир вақтлар Салмон Хон, кейинроқ эса Ранбир Капур билан учрашиб юрган. Бироқ иккала актёр билан ҳам муносабатлари узоққа бормаган Катрина Каиф 2019 йилдан бошлаб ҳамкасби Вики Каушал билан учрашиб бошлаган. Шундан сўнг улар ҳақида турли хил миш-мишлар тарқалган ва кейинроқ жуфтлик турмуш қурмоқчи бўлганини маълум қилган.

Эслатиб ўтамиз, аввалроқ Катрина Каиф қандай қилиб миллиардер бўлгани ва шу ҳақидаги сирни айтгани ҳақида хабар берилган эди.