Ўзбекистонда хизмат кўрсатган артист Раъно Ярашева «Omon-omon» кўрсатувига берган интервьюсида синглининг юзини юлиб олгани ҳақида сўзлаб берди.

Актрисанинг таъкидлашича, тўртта ўғилдан кейин туғилган эрка қиз бўлган. Шу сабабли Раъно Ярашева онасини синглисидан қизғонганини ва бешикда ётган пайти юзини юлиб олганини айтди. Унинг сўзларига кўра, бувиси билан яшаган ҳамда унинг ҳаёти ҳақида «Меҳрнигор» деган китоб ёзган.

«Мен жуда узоқ кутилган қиз бўлганман. Тўртта акамдан кейин мен туғилганман. Эркатой қиз бўлганман. Ота-онам, бобо-бувиларимга ҳам эркалик қилганман. Оғзимдан нима чиқса, муҳайё бўларди. Мендан кейин сингилларим туғилган. Озгина сингилга эътибор бўлса, чидай олмас эканман. Унга қараманглар дер эканман. Бир куни бешикда чақалоқ ётса, нариги томонидан ўтиб юзини юлганман. Қон чиқадиган даражада юлиб олганман. Ўша пайти икки ёшда бўлганман. Онамнинг онаси Хадича бувим ўзи билан уйига олиб кетган. Саккиз ёшгача бувимнинг қўлида катта бўлганман. Ўша пайтдаги воқеаларни ёздим ва ‘Меҳрнигорʼ деган китоб шаклида нашрдан чиқди», — дейди у.