Хонанда Каниза ўз Instagram саҳифасида Бўстонлиқ тумадидаги тўйда маст эркак билан ҳақоратли сўзларни ишлатиб жанжаллашгани акс этган видеога изоҳ берди.

Унинг сўзларига кўра, тўйни яхши кайфиятда бошлаган. Хонанда қўшиқ айтаётган пайтда маст эркак келиб, шимининг орқа чўнтагига пул қистирмочи бўлган. Лекин унинг қўриқчилари бунга йўл қўймаган. Шундан кейин Каниза ўша эркакнинг ҳақоратли сўзларни ишлатганини пайқаб қолган. У бошида чиройли огоҳлантириш берганини таъкидлади.

«Тўй 1 ҳафта олдин Бўстонлиқ туманида бўлганди. Тўйга чиройли кайфиятда бордик. Тўй ҳам яхши кайфиятда бошланди. Ҳамма жойда ҳам битта бефаросати бўларкан. Ўша ерда битта эркак ўзини маданиятсизларча тутди. Пулни аёл кишининг шимининг чўнтагига қистирмоқчи бўлди. Умуман рамкага сиғмайдиган қилиқ қилди. Бу ҳолатга боллар ҳам йўл қўймади. Мен аҳамият бермадимда қўшиқларимни айтавердим. Ёнгинамда столда ўтирганди. Масофа бир ярим метр эди. Сўкинаётганини пайқаб қолдим. Битта қўшиқни айтиб бўлгандна кейин, тўхтат дедимда у кишига чиройли огоҳлантириш бердим. Ака сизнинг ҳам аёлингиз, синглингиз бордир. Чиройли қилиқ қилмаяпсиз десам, баланд овозда мени ҳақорат қилишни бошлади. Аҳамият берингки, ўша ерда мен қандай ҳақорат қилаётган бўлса, мен ҳам шундай жавоб қайтардим. Қўлимда микрофон бўлгани учун менинг овозим баландроқ чиқди», — дейди у.

Шунингдек, унинг сўзларига кўра, эркак кишига мумкин деган фикр жамиятга сингиб кетган. Каниза эркакларнинг уриш, сўкишига жим қараб турадиган жамиятда яшамаётганини таъкидлади. Шу билан бирга хонанда аноним блогерларга уни ғийбат қилгани учун раҳмат айтди.

«Тўғри сизлар ҳозир аёл кишисан, сенга мумкинмас, чидашинг керак эди дейишингиз мумкин. Лекин кечирасизу биз аёл кишимиз. Тўғри сабр қилишимиз керак. Лекин охири ёриласиз. Эркак кишига мумкин деган нарса бизнинг жамиятнинг онгига ўтириб қолган. Лекин демократия деган нарса қани? Биз аёллар эркакнинг индамай сўкишига ҳам, ҳар хил қилиқларига ҳам, уришига ҳам индамай чидайдиган жамиятда яшамаяпмиз. Шу ўринда аноним блогерларга катта раҳмат айтмоқчиман. Ўзингизнинг изоҳларингизда минглаб ғийбатчиларни йиғиб, менинг гуноҳларимни тўкканингиз учун сизлардан Аллоҳ рози бўлсин», — дейди хонанда.