Ўзбекистонда хизмат кўрсатган артист, «Меҳнат шуҳрати» ордени соҳибаси, Ёш томошабинлар театри актрисаси Ёдгора Зиёмуҳаммедова турмуш ўртоғининг ўлими ҳақида гапириб берди.

Унинг сўзларига кўра, отасиз ўсгани учун турмуш ўртоғига отадек меҳр қўйган. Актриса эрининг вафотидан сўнг 6 ой ётиб қолганини айтди. У жуфти ҳалолинг вафотига автоҳалокат сабаб бўлганини таъкидлади.

«Иккимизда ҳам меҳр кучли эди. Отасиз ўсганим учун уларга отамдек кўриб, меҳр қўйган эканман. Вафот этганларидан кейин 6 ой ётдим десам ҳам бўлади. Чидай олмадим бунга. Меҳмон келганди. Уларни манзилига кузатиб, ортга қайтаётганимизда орқамиздан машина келиб урган. Шуни эслаб қолганман, холос. Касалхонага олиб борганмиз. 14 кун ўша ерда бўлган», — дейди у

Шунингдек, у турмуш ўртоғининг орқа миясидаги йўғон томири узилиб кетгани сабабли дунёдан кўз юмганини айтди. Актрисанинг сўзларига кўра, эрининг вафотидан сўнг унинг қабрига бориб ётиб олган.

«Турмуш ўртоғимнинг орқа миясидаги йўғон томири узилиб кетган экан. Улар ҳаётга қайтмаслигини шифокорлар билган, аммо буни менга тушунтира олмаган. Тушуна олмасдим ўша пайтда. Ҳар куни реанимация эшиги тагида ўтирардим. Барча қариндошларимиз мен билан эди. У кунлар жуда оғир бўлганди. Уйга келиб, овқат тайёрлаб, яна қайтиб бораман. 3 та фарзандим билан ўтириб чиқардик. ‘Фотима-Зухра-Тоҳир, сизлар эгизаксизлар. Сизларнинг дуоларингиз Оллоҳга етиб боради’, дер эдим. Мен отасиз ўсганман, буни сизларга раво кўрмайман, дер эдим. Оллоҳдан туни билан сўрайверардик. У кунлар шу қадар оғир эди-ки, ўрнимдан тура олмай қолгандим. Агар турадиган бўлсам ҳам, икки киши суяб туриши керак эди. Турмуш ўртғимнинг қабри бошига бораверардим, ётиб олардим, йиғлардим», — дейди актриса.