Актриса Элмира Раҳимжонова «Чархпалак» сериалидан кетганининг сабабини айтди.

Унинг сўзларига кўра, бунга гонарар сабаб бўлмаган. «Чаёнгул» сериалига кетиб қолгани режиссёрнинг нафсониятига теккан. Элмира Раҳимжонова бошқа сериалга ўтишининг сабаби у «плёнка»га олинганини ва бу унинг орзуси бўлганини таъкидлади.

«Бу ерда умуман гонарар йўқ. Бу ерда масала гонрарда бўлмаган. Мен ‘Чаёнгулʼ сериалининг съёмкасига кетиб қолганим режиссёр раҳматли Шавкат Жунайдуллаевнинг ғашига теккан. Мана йиллар ўтганидан кейин айтяпман. Аввалдан режиссёрлар ҳамма даргоҳда ўзини кимдир деб билишарди. Бизнинг театрда, кинода режиссёрларга бўлган ҳурматимиз жуда баланд эди. Уларнинг юзига ҳамма нарсани гапиравермасдик. Бизда оралиқ масофа бўларди. Катта кино менинг орзуйим эди. ‘Чаёнгулʼ фильми ‘плёнка’га олинган. У пайти ‘плёнка’да ўйнаш ҳар битта актрисанинг орзуси бўлган. Cанъатга энди келган қизни бирданига катта кинога чақириши мўъжиза эди. Шундан кейин мен Шавкат аканинг олдига келиб, мени ‘плёнка’га олинадиган сериалга таклиф қилишяпти. Мен 1 ойда сизга қайтиб келаман деганман. У майли деган. Лекин ўша пайти унинг нафсониятига тегиб қўйганман. Чунки мени Шавкат Жунайдуллаев кашф қилган эди», — дейди актриса.