Актриса Луиза Расулова YouTube’даги «Salom live» лойиҳасига берган интервьюсида қариндошлари билан муносабати ҳақида айтди.

Унинг таъкидлашича, қариндошлари билан ‘борди-келдиʼ қилмайди. Актриса бунга сабаб онасининг хўрлангани эканини айтган. Луиза Расулованинг сўзларига кўра, тоғалари онасини уриб, нарсаларини юлиб кетган. Шунингдек, бўлиб ўтган ишларни кечиролмаслигини таъкидлади.

«Яқинда онам гаплашишни, ‘борди-келди’ни бошлади. Мен қаршилик қилмадим. Лекин ўзим бу нарсада иштирок этолмайман. Онамни хўрлашгани ҳеч қачон эсимдан чиқмайди. Кези кеганда акалари онамни уриб, кўзимнинг олдида нарсаларини юлиб кетган пайтлари ҳам бўлган. Тўғри, одам кечримли бўлиши керак. Лекин мен бундай инсонлар тоифасига кирмайман. Чунки она барибир онада. Биз акам билан жуда ҳам аҳилмиз. Ярим бўлагим деса ҳам бўлади. Лекин мен ўша нарсани онамнинг оиласида кўрмаганман. Қандай қилиб битта қориндан талашиб тушган инсонлар бир-бирини эсдан чиқариб юбориши, озор бериши, уруши мумкин? Мен тушунмайман. Мен қабул қила олмайман бу нарсани. Ҳеч қайси тарафдан қўллаб-қувватлаш бўлмаган. На ота тарафдан, на она тарафдан. Ҳозирги кунда опа-сингиллари онам билан ‘бориш-келишʼ қилишни бошлашган. Қўлимдан нима келса, ҳаммасини онамга қилиб бераман. Лекин мен қадам қўёлмаяпман. Мен боролмайман. Битта столда ўтириб, улар менга кулиб гапирса мен буни кўтаролмайман. Хафа қилиб қўйишим мумкин. Ундан кўра мен уларни улар мени кўрмагани маъқул. Менга керак эмас ундай яқинлар», — дейди актриса.

Эслатиб ўтамиз, аввалроқ актриса отасининг вафотидан сўнг жуда қийналгани, ҳатто нон тополмаган кунлари ҳам бўлганини айтганди.