Маданият ходими, бастакор Султонали Раҳматов YouTube’даги «Chotki Tv» лойиҳасига берган интервьюсида собиқ турмуш ўртоғи, хонанда Нилуфар Саидовани ургани ҳақида гапириб берди.

У депрессияга тушган вақтида хонанда билан урушиб қолган. Иккинчи турмуши бўлган, Нилуфар Саидовадан туғилган қизларини охирги марта 2012 йилда кўрган. Унинг сўзларига кўра, хонанда билан ажрашишининг сабабини айта олмайди. Бироқ у Нилуфар Саидовани ижодкор деб айтолмаслигни таъкидлади.

«Нилуфарни билмайман, охирги марта 2012 йилда қизларимни кўрдим. Қизларимни доим кўрардим, ўша вақтда уришиб қолдик, депрессия бўлган вақтлар эди. Шундан буён қизларим билан кўриша олмаяпман. Қолган фарзандларим мен билан бирга, деярли. Иккита қизим бор, улар ҳар ҳафта келиб туришади. Нилуфар билан ажрашишимнинг сабаби бўлган. У яхши аёл, лекин катта хато қилди. Хатоларини айтишни ўзимга маъқул кўрмайман, омад тилайман. Барибир у она, фарзандларимнинг онаси, яхши ижодкор. Аниқроғи, ижодкор дея олмайман, яхши хонанда. Агар яхши ижодкор бўлганида ўзи чиқа олган бўлар эди, ижодкор эмас у», – дейди композитор.

Шунингдек, бастакор хонандани 50 нафар қиз орасидан танлаб олганини айтди. Бошида Нилуфар Саидованинг ўрнига Гулчеҳра исмли қиз танланган. Бироқ кейинчалик танлов ўзгартирилган. Султонали Раҳматовнинг таъкидлашича, хонанданинг овози яхши бўлмаган. 3 йил ичида унвон олиш учун меҳнат қилинган.

«Йўқ, уйланмасдим ҳам. Агар уйланганимда, албатта, ўзи жуда ҳам хоҳласа, кўнглига қараган бўлардим. Нилуфарни 1998 йилнинг январь ойида Театр ва рассомчилик ( ҳозирги Ўзбекистон давлат санъат ва маданият) институтига бориб, 50 нафар қиз ичидан танлаб олганман. Аслида Нилуфар иккинчи пландаги қиз эди, биринчи ўринда Гулчеҳра деган қизни танлаганман. Бир ойнинг ичида у қизни чиқариб юбордим. Кейин унинг ўрнига Нилуфар билан алоҳида шуғулланишни бошладим. Нилуфар билан нолдан бошлаб ишлаганман, унинг овози йўқ эди. Биринчи ижролари ҳам турибди, эшитган одам уни Нилуфар деб ўйламайди, чунки ҳали кучли эмасди. Кейин биргаликда тинимсиз ишлаб, уч йил ичида унвон олишга ҳам ҳаракат қилганмиз. Меҳнат қилганмиз ва бунинг эвазига кўп нарсага эришганмиз», — дейди у.

Унинг сўзларига кўра, Нилуфар Саидовани ҳақоратлаган, уришган. Бастакор собиқ турмуш ўртоғига қўл кўтарганини, ҳозир эса бундан афсусда эканини айтди. Аммо ўша пайтда уришга тўғри келганини, эркаклик ғурури сабабли шуднай қилганини таъкидлади.

«Нилуфардан хафамасман, ундан икки қизим бор. Уч нафар фарзандим биринчи оиламдан. Уни ҳақоратлаганим, уришганим тўғри, аслида бундай қилмаслигим керак эди, лекин эркаклик ғурурим бор. Ўша томондан, маълум сабабга кўра, ҳақоратлаганман, уришганман, ҳаттоки қўл ҳам кўтарганман — айбим шу. Нилуфардан бу учун кечирим сўрайман. Шу даражада бўлганки, чидай олмай қўл кўтарганман. Тасаввур қилинг, одамларни олдида қўпол муомалада бўлса, мен ким бўламан, ълаттаʼ бўламанми шунда? Нима қилишим керак эди? Хўп хотин ака, деб кетишим керакмиди? Мен унақа эмасман. Бўлмаса, ўзимдан ўзим ураманми, сўкаманми? Агар ичиб олган бўлсам, тушуниш мумкин. Лекин мен ичмайман, чекмайман ҳам. Ҳамма хатосини тан олиши керак. Ҳозир келиним бор, болаларимга ҳам айтаман, бирортаси қўлини кўтармайди. Мен такрорлаган хатони қайтармасин деб, уларни назорат қиламан. Шу икки қизим Нилуфарда, унинг яна битта фарзанди бор, отаси бошқа», — дейди Султонали Раҳматов.