Ўзбекистон халқ артисти Юлдуз Усмонова онаси вафотидан олдин оғир касал бўлганини айтиб берди.

Унинг сўзларига кўра, онаси альтсгеймер касаллиги билан оғриган. Касаллик сабаб онаси оила аъзоларини яхши танимаган. Бироқ Юлдуз Усмонова онасининг олдига борганда уни юраги билан таниганини ва «Меникилар келди», деб айтганини таъкидлади.

«Онам альтсгеймер бўлиб қолган. Бизни танимайди. Лекин уйга борганда ‘Меники келдиʼ, дер эди. Мия танимагани билан юрак танир экан. ‘Меникилар келдиʼ, дейди. Болаларини танийди», — дейди у.

Шунингдек, у онаси тўғри йўлга бошлагани, қаттиққўл бўлгани ҳақида гапирди. Хонанданинг сўзларига кўра, ишчилар оиласида туғилган. Бироқ онаси 8 нафар фарзадни уйли-жойли қилган.

«Тўғри йўлга бошлаган экан. Ҳар битта ака-укаларимни уйли-жойли қилган. Ишчилар оиласи бўлганмиз. Ҳаммамиз ойликни бир жойга ташлар эдик. Шунинг учун онам қаттиққўл эди. Ипакчилар комбинатуда ишлаган. Осон эмас 8 та болани уйли-жойли қилиш. Мана шундай бахтли юришимда ота-онамнинг ҳиссаси катта. Шундай онам борлигига, ўқлов билан урганига худога шукур. Яни ҳам онам шундай тарбия берган экан», — дейди хонанда.

Эслатиб ўтамиз, аввалроқ Юлдуз Усмонованинг онаси Раҳима ая Усмонова 6 ноябрь куни 95 ёшида вафот этгани ҳақида хабар берилган.