Феруза Норматова эрга тегиш учун ҳижобга киргани ҳақидаги миш-мишларга аниқлик киритди

Актриса, бошловчи Феруза Норматова турмушга чиқиш учун ҳижобга кирмаганини айтди.

Унинг сўзларига кўра, ҳижоб инсон учун эмас, Аллоҳ буюргани учун ўралади. Актриса ҳижоб ўрамаган пайти совчилари кўп бўлганини айтди. Шунингдек, бошловчи рўмол билан хулоса қилиш нотўғри эканини таъкидлади.

«Эрга тегиш учун ҳижобга кирди деганларга икки оғиз гапим бор. Ҳеч қачон инсон учун рўмол ўралмайди. Бу аввало Аллоҳнинг буйруғи. Мен ўраниб ақлли бўлдим, бўлди демоқчи эмасман. Бу нарсани билганман, лекин журъат қилолмаганман. Бу Аллоҳнинг фарзи. Ҳолиқнинг буйруғи турганда, махлуқнинг фикрига қаралмайди деган гап бор. Чиройли бўлиб юрганимда, қўпол қилиб айтганда ошиқларим кўп эди. Ферузахон сиз билан турмуш қурсак, соҳангизни бемалол давом эттирасиз дейдиган совчилар бор эди. Айтмоқчи бўлганим, Аллоҳнинг буйруғи билан қилинадиган иш. Эрга тегиш учун ҳижоб ўрайдиганларни тушунмайман. Бу билан кимга нимани исботламоқчисиз? Одам рўмол ўрагани билан ақлли бўлиб қолди деб тушуниш ҳам керак эмас. Биз инсонмиз. Бу эса синовли дунё. Рўмол ўрашга журъат этолмай, аслида ҳалол ҳаётда яшаб юрган қизлар ҳам жуда кўп. Рўмол билан хулоса қилиш нотўғри нарса деб ўйлайман», — дейди у.