Маданият вазири Озодбек Назарбеков ўқувчилик йиллари ва ҳаётиадги энг катта саҳна ҳақида гапириб берди.

Унинг сўзларига кўра, 10 ёшлигида мактаб саҳнасида Илҳом Жўраев ва Санобар Раҳмонова куйлаган она ҳақида қўшиқни куйлаган. Ўша пайтлари Озодбек Назарбековнинг онаси вафот этганди. Шунинг учун у қўшиқни ўкинч билан куйлаганини таъкидлади. Ана шу саҳна ҳаётидаги энг катта ва ҳаяжонли саҳна бўлганини айтди.

«Бунинг тарихи озгина ғамгинроқ. Ўн ёшимда қўшиқ айтган бўлсам, яқинда онамдан айрилган пайтларим бўлган. Шунинг Илҳом Жўраев билан Санобар Раҳмонова куйлаган Она ҳақида дуэт қўшиқ бўлган. Биринчи ёдлаб ижро қилган мана шу қўшиғим бўлган. Эндигина онамдан ажралган йил эди. Шундай бир ўкинч билан ижро қилганман бутун зал йиғлаган. Ўзим ҳам йиғлаганман. Ўша кичкинагина мактаб саҳнаси мен учун биринчи қадам қўйилган энг муқаддас саҳна бўлган. тўрт минг-беш минг ёки эллик минг-юз минг одамлик катта-катта майдонларда эҳтимол ундай ҳаяжон бугун топилмайди. Ундан кейин менинг ҳаётимда бундай катта саҳна учрагани йўқ», — дейди Озодбек Назарбеков.

У, шунингдек, дарсларга киритишмагани учун эшикнинг тирқишидан дарсларни эшитгани ҳақида айтди.

«Рубоб олиш менинг орзум бўлган. Менинг Акмал деган синфдошим бўлган. Унинҳ рубоби бор эди. Дарси бор куни мактабга рубобини олиб келарди. Мени синфга киритишмасди. Калитнинг тирқишидан қулоғимни қўйиб, берилган дарсларни ёдлаб олардим. Синфдошим чиқиши билан унинг рубобини олиб хотирамдаги куйни кўчирардим. Дарс тугагандан кейин у ҳам мен ҳам уйга кетардим. Уйга келгандан кейин маҳалламдаги яна бир дўстимнинг рубобини олиб шунда машқ қилардим. Шундай қилиб дарсларни ўзлаштирардим», — дейди Озодбек Назарбеков.