Актёр, продюсер, режиссёр Алишер Узоқов YouTube’dagi «IntervyuTV» лойиҳасига берган интервьюсида Кинематография агентлигининг бош директори Фирдавс Абдухолиқовнинг шахсан ўзи уни кинофестивалнинг ёпилиш маросимига таклиф қилганини айтди.

Унинг сўзларига кўра, ҳақиқатдан ҳам Фирдавс Абдухолиқов унга алоқага чиққан ва кинофестивалнинг ёпилиш маросимига таклиф қилган. Бироқ Алишер Узоқов хизмат сафаридалиги учун тадбирга боролмаган. Алишер Узоқовнинг онаси Шохида Узоқова тадбирда иштирок этган. Актёр ёпилиш маросимига боролмаслигини онасидан айтиб юборганини таъкидлади.

«Кинофестивалнинг ёпилиш маросимига таклиф қилиндим. Ҳақиқатдан Фирдавс аканинг ўзи алоқага чиқиб, очилиш маросимида бўлиб ўтган ҳолатни айтиб ўтди. Ёпилиш маросимига келолмаганимнинг сабаби сафарда эдим. Очилиш маросимига чақирилмаганимдан кейин катта эҳтимол билан ёпилишига ҳам чақирилмасам керак деб ўйлаб, хизмат сафарига Бухоро ва Қашқадарёга йўлга чиқиб кетгандим. Айнан ўша ёпилиш маросими ўтказилган кеча қайтдим. Мен улгурмадим. Онам борди. Унга айтиб қўйдим боролмадим деб. Шунча одамга насиб қилдику, лекин менга насиб қилмади», — дейди у.

Эслатиб ўтамиз, аввалроқ актёр мазкур фестевалга таклиф қилинмагани учун ташкилотчиларда ҳафа эканини айтганди. Шундан сўнг инстаблогер Озод Ҳуррамов унинг таклиф қилинмагани сабабини маълум қилган.