Янги йил байрамида экранларда намойиш этилиши анъанага айланган, кичик болалардан тортиб катталар ҳам севиб томоша қиладиган кўп қисмли «Уйда ёлғиз» фильми ҳақида кўплаб қизиқарли фактлар мавжуд. Қуйида «Shoubiz.uz» нашри улардан айримларини келтириб ўтади.

Муносиб номзод

Фильмда бош ролни Маколей Калкин ижро этган. Кичик актёр «Уйда ёлғиз» фильмидан олдин бир нечта кинофильмларда суратга тушган. Кино ижодкорлари Маколей Калкиндан ташқари 50 га яқин номзодни синовдан ўтказади, бироқ ундан муноcиб номзод топмайди ва бош қаҳрамон сифатида уни қабул қилади.

Ўйлаб топилган ҳолат

Маколей Калкин ҳақиқатдан ҳам истеъдодли актёр. Масалан, кинода Калкин ҳаммомда ўзини юзига уриб, бақирган саҳнаси мавжуд. Ҳолатни актёрнинг ўзи ўйлаб топган ва бу вазият сюжетга мос тушган.

Фильмда ва ҳаётда қариндош бўлган кичик актёр

«Уйда ёлғиз» кинокартинасида яна бир кичик Калкин роль ижро этган. Мазкур фильмдаги Кевиннинг амакиваччаси Фуллер ҳаётда унинг укаси Киран ҳисобланади.

Ҳақиқий заҳарли ўргимчак

Фильмда Кевиннинг босқинчилардан қочишига кўмаклашган тарантул ҳақиқий заҳарли ўргимчак бўлган. Кевин босқинчи Марвиннинг юзига шу ўргимчакни қўйиб юборади. Актёр ўргимчакни қўрқитиб юбормаслик учун бақираётган саҳнада шунчаки оғзини очиб туради, бақираётган овоз эса кейин монтаж орқали берилган. Бу саҳна фақат бир дублда олинган, қайта олишларига актёр розилик билдирмаган.

Қиёмдан қилинган ўйинчоқлар

Фильмнинг суратга олиш ишларида актёрларнинг жароҳат олмасликлари учун ҳақиқий эмас сохта нарсалардан фойдаланилган. Масалан, Марвиннинг оёғига кирган арча ўйинчоқлар, шиша идиш, ойналарнинг синиқлари  буларнинг ҳаммаси қотган шакар қиёмидан тайёрланган. Бироқ шунга ҳам қарамай актёр оёғига резинадан тайёрланган ҳимоя воситасини кийган.

Ёлғон жароҳатлар

Уйга ўғирликка тушган босқинчилар сон-саноқсиз жароҳатлар олади. Тепаликдан йиқилиш, бўёқ идишларининг урилиши, куйишлар, ток уриши, шишаларнинг оёққа кириши, хуллас, тиббиёт ходимларининг таъкидлашича, буларнинг барчаси чинакамига содир бўлганда уларнинг ўлимига сабаб бўлар эди.

Туристлар манзилига айлаган Маккалистерлар уйи

Маккалистерлар яшаган уй ҳақиқатдан ҳам мавжуд. У АҚШнинг Иллинойс штатида, Линколн Авеню, 671 манзилида жойлашган. Суратга олиш жараёнида уйнинг биринчи қавати, ётоқхона ва ошхонасидан фойдаланилган. Қолгани эса декорация қилинган. Ҳозирда бу уй туристлар учун яхши манзил ҳисобланади.