Ўзбекистонлик Александр Ли Россиянинг «Первый канал»даги «Голос» мусиқий шоусининг биринчи босқичидан ўтди ва иштирокчига айланди.

Тошкентлик 29 ёшли Александр қўшиқчи Slava Marlow’нинг «Ты гориш как огон» қўшиғини ижро қилган. Шоудаги 4 ҳакамдан иккиси (Пелагея ва Леонид Агутин) тошкентлик хонанданинг ижросини маъқул деб топди ва у билан ишлаш истагини билдирган.

Александр Лида танлаш имкони пайдо бўлган ва у Леонид Агутин билан ишламоқчилигини маълум қилган ҳамда унинг жамоасига қўшилган.

«Агутин мен учун афсонадир. Ижродан олдин хавотирда эдим. Лекин чиқишинг билан мусиқа янграшни бошлайди, кейин одатий муҳит пайдо бўлади ва ҳаммаси изига тушади», — дейди хонанда.

Унинг таъкидлашича, авваллари автомобиль ювиш шохобчасида ишлаган. Ҳозир эса қўшиқчилик унинг ягона касбидир.

Эслатиб ўтамиз, аввалроқ Милена Мадмусаева Москвада тақдирлаш маросимида иштирок этгани ҳақида хабар берилган.