Рэпер, Fayzee тахаллуси билан ижод қилувчи Файзуллоҳ Қорабоев Instagram саҳифасида «йўқ жойдан» 4 миллион сўм жарима ёзилгани учун МИБчиларни сўккани акс этган видео жойлади.

Унинг сўзларига кўра, январь ойида машинаси 223 минг ва 81 минг сўмлик жарималарга тушган. Узоқ вақтдан бери уларни тўламагани учун иши МИБга ошган. Рэпер бюрога борганида узоғи 300 минг сўмга борадиган жаримасини 4 миллион сўм тўлаши кераклигини айтишганини таъкидлади.

«Менинг машинамнинг жаримаси МИБга ошиб кетган экан. 223 минг сўмлик ва 81 минг сўмлик жарима. Январь ойида жаримага тушганман. Ишим МИБга ошиб кетган. Иккаласи умумий 300 минг сўмлик жарима. Ишингиз МИБга ошгани ҳисобига 4 миллион тўлайсиз деяпти. Мени давлатга битта гапим бор. Одамларнинг ойлиги 2 ёки 1 ярим миллион. Қаердан тўлайди бунча пулни ойлиги билан. Қаерга қараб фол очяпсизлар. Мен тўғриси билмайман», — дейди.

Шунингдек, у бугун МИБнинг YouTube’даги саҳифасида ҳаммаси англашилмовчилик бўлганини айтди. Рэпер 86 минг сўмлик жаримаси учун айнан шунча пул тўлаганини, ортиқча ҳеч қандай маблағ бермаганини таъкидлади.

«Ассалому алейкум. Менинг исмим Қорабоев Файзуллоҳ. Кечаги тарқалган видео учун озгина тушунча бериб ўтмоқчи эдим. Бугун МИБ идорасига келдим. 86 минг сўмлик жаримам бор эди. Шунча пулни тўладим. Бошқа ҳеч қандай пул тўлаганим йўқ. Кеча озгина англашилмовчилик бўлибди. МИБ идорасида тушунтиришди. Ҳозирги ҳолатда ҳеч қандай қарзим йўқ», — дейди у.