Актриса, сценарист Шоира Ғиёсова «Келгинди келин» фильмида бош ролни актриса Дилноза Кубаеванинг ўрнига хонанда, актриса Лола Йўлдошева ўйнаши керак бўлганини айтди.

Унинг сўзларига кўра, Лола Йўлдошева ўша пайтда турмушга чиққан. Шу сабабли фильм ижодкорлари бошқа актриса қидиришга тўғри келган. сценарист Дилноза Кубаевани кастингга келганида ичидаги оловни кўрганини айтди. Шунингдек, Шоира Ғиёсова бу фильм Дилноза Кубаеванинг видеокарточкаси бўлганини таъкидлади.

«Бундай ҳолатлар бўлиб туради. Жуда кўп киноларда шундай бўлган. Масалан, мен ‘Келгинди келин’ фильмида бош ролни Лолага деб тасаввур қилгандим. Чунки ўша образ, персонаж русийзабон, жуда ‘европейский’ қиз бўлиши керак эди. У пайти Лола турмушга чиқиб кетди. Актриса қидиришга тушиб қолдик. Кейин Дилноза Кубаева келганда, ичидаги оловни кўрдик. Ташқи кўриниши ўхшамагани билан ички ҳиссиёти билан ютиб кетди. Бу Дилноза Кубаеванинг видеокартокаси бўлиб қолди», — дейди у.

Маълумот учун, «Келгинди келин» фильми 2006 йил суратга олинган. Фильм режиссёри Рустам Сагдиев. Сценарий муаллифи Шоира Ғиёсова. Унда бош ролларни Фаррух Соипов, Дилноза Кубаева ҳамда Жаҳонгир Позилжонов ижро этган.