Телебошловчи, журналист Амирхон Умаров YouTube’даги «Subyektiv» лойиҳасига берган интервьюсида бир ойлик даромади ҳақида гапирди.

Унинг сўзларига кўра, даромати фақат ойликдан иборат эмас. Телебошловчи телеканалдан оладиган даромади 3 миллион сўм атрофида эканини айтди. Амирхон Умаровнинг ўзининг шахсий production’и бор. Унда 10 дан ортиқ лойиҳалар қилади. Улардан баъзиларининг рейтинги унчалик баланд эмас. Рейтинги баланд лойиҳалар эса қолганларини қоплаши мумкин.

«Менинг даромадим фақат ойлик маошдан иборат эмас, яъни компаниялар билан ҳам ишлайман. Қўшимча даромадларим бор. Катта ишда ишлайдиган одамлар ойлигини сўрасангиз, ‘3 миллион сўм’, дейди. Менинг ойлигим қайсидир маънода шу атрофда, лекин қўшимча даромадларим бор. Чунки битта жойда ишламайман. Ишим жуда кўп. Продуcтион ўзимники бўлгани учун катта пул айланиши мумкин. Лекин ҳамма пул менинг чўнтагимга бўлади деганимас. Мисол учун, ўнта лойиҳам бўлса, биттаси қолганини қоплаши мумкин. Чунки уларнинг рейтинги жуда юқори эмас ёки ҳомийлар жалб қилинмаган. Жамоамда юзга яқин одам ишлайди. ‘Амирхон Умаров шоуси’, ‘Репортёр’, ‘Muzqaymoq party’, ‘Жиддий болалар’, ‘Қафасдаги гўзаллик’, ‘Мендирман’ ва янги реалитй-шоу, ‘Ақлвой’га янги лойиҳа, мактаб ҳақида янги кўрсатув қиляпмиз. Ундан ташқари, иккита сериал ҳам бор», — дейди бошловчи.

Эслатиб ўтамиз, аввалроқ Амирхон Умаров унинг номидан компания юритаётганлар жавобгарликка тортилишини айтганди. Шунингдек, у комедия йўналишидаги кўрсатувларга бормаслигининг сабабини айтгани ҳақида хабар берилганди. Шу билан бирга, телебошловчи уйлангани ва фарзанди борлиги ҳақидаги миш-мишларга ойдинлик киритганди.