Актёр Ҳусан Мусабоев «Omon-omon» кўрсатувига берган интервьюсида «Қўрқма юрак» сериалидаги роли сабаб жазоланганини айтди.

Актёрга шундай такиф билан мурожаат қилинган режиссёр ҳар доим бир хил ролда ўйнашини, унга янгилик киритиш кераклигини айтган.  Актёрнинг роли эри қамалиб кетган ёш аёлга ичиб келиб ташланишдан иборат бўлган.

«Мен ‘Асира’ деган кинода ўйнаётгандим. Шунда бир режиссёр келиб ‘Ҳусан ака 2 кунлик съёмкангиз бор. Жуда зўр роль. Сиз ҳар доим бир хил роль ўйнайсиз. Мен сизни синдираман’, деди. Ҳозир кино олиш осон бўлиб кетибди. Матнни ўқиб турибди. Сиз сўзни қайтариб, юзингизнинг мимикасини тўғирласангиз бўлди. Бу кино эмас. Бу ижод эмас. У ҳамма шундай қилётганини айтди. Бир аёлга кўнгли тушиб қолади. Ичиб келиб, унга ёпишади. У ёшгина қиз бўлади. Турмуш ўртоғи қамалиб кетганди», — дейди у.

Шунингдек, актёрга сериални кўпчилик кўрмаслигини айтган. Бироқ Ҳусан Мусабоев қаймоқ олиш учун бозорга тушганда, сотувчи аёл унга ўша роли учун қаймоқ бермаслигини айтган.

«Зўр бўлади, ака. Ўйнайверинг. Ҳеч ким кўрмайди, деди. Ҳамма кўрар экан. Бозорга бордим. 20 йилдан бери бир онахондан қаймоқ олардим. Мени кўриб, бошқа жойга бурилиб олди. ‘Мен сенга қаймоқ бермайман. Бор, йўқол бу ердан’, деди. ‘Мен нима қилдим?’, десам. ‘Кеча телевизорда нима қилиб юргандинг? Ёш қизларга ёпишишга уялмайсанми?’, деди. Бу менинг ишим эканини айтдим. Кейин менга ‘Сен ундай ролларни умуман ўйнама. Менинг олдимга келма’, деди. Ўша куни бошқа жойдан қаймоқ олиб кетдим», — дейди актёр.