Ўзбекистонда хизмат кўрсатган артист Козим Қаюмов YouTube’даги «Birzum Tv» лойиҳасига берган интервьюсида Ислом Каримовнинг «любимчиги» бўлгани ҳақида гапирди.

Ислом Каримов миллий эстрада шундай бўлиши керак, деб унинг қўшиқларини мисол қилган. Хонанда биринчи президентнинг эътиборига тушгандан сўнг Ўзбекистонда хизмат кўрсатган артист унвонини олганини айтди. Шунингдек, Козим Қаюмов Мустақиллик байрамида қўшиқ куйлаш учун борганда, ҳамма уни табриклаганини таъкидлади.

«Ўша қўшиқни айтганимни Ислом Каримов кўриб қолиб, ‘Мана мен сизларга нимани айтгандим. Миллий эстрада деб сизларга шуни айтгандим. Бизнинг эстрадамиз мана шундай йўналишда бўлсинʼ, деган. Бир пайт телевидениенинг раиси мени табриклади. Ҳайрон бўлдим. ҳар ойда бўладиган оддий концерт эди. Эртаси куни бирдна телевидениега чақирди. Нимага бирдан бундай бўлганига тушунмадим. Кейин Лариса опадан сўрадим. У ‘Сиз президентнинг севимлиси бўлдингиз. Концертда танбур чалиб айтган қўшиқни айтганингизни кўриб қолибди. Жуда маъқул келибди. Бундай йигитларни кўтариш керакʼ, деди. Хурсанд бўлдим. Ўша йили 31 август куни концертда майдонда чиққанман. Шу куни эрталаб мени ҳамма унвонли бўлганим билан табриклади», — дейди хонанда.