Актриса, хонанда Дурдона Қурбонова YouTube’даги «Intervyu Tv» лойиҳасига берган интeрвьюсида хонанда Имроннинг оиласини бузиб юбориши мумкин бўлган сир ҳақида гапирди.

Унинг сўзларига кўра, ижтимоий тармоқдаги жонли эфир пайтида оиласини бузиб юбориш ҳақидаги гаплар Имронга тегишли бўлмаган. Актриса у гапларни яқин бўлмаган инсонига айтган. Шунингдек, Дурдона Қурбонова ўша гаплари акс этган видео YouTube’да тарқалиб кетганини ва бу унга ёқмаганини таъкидлади.

«Шу ўринда бир маълумотга ойдинлик киритиб кетишим керак. Жонли эфир қилганимда битта инсонга тааллуқли гап айтган эдим. Кўпчилик у гапимни Имрон акага жавоб берибди, деб ўйлабди. Менда шунақа маълумотлар борки, уларни айтадиган бўлсам, оиласи бузилиб кетиши мумкин, деган гапимни Имрон акага айтилган гап, деб тушунишибди. Жонли эфирда гапирган инсоним менга яқин инсон эмас, менга алоқаси йўқ инсон. Унинг исмини айтмаганим учун кўпчилик у гапларимни Имрон акага айтилган, деб ўйлаб, монтаж қилиб, YouTube’га чиқариб юборишибди. Бу нарса менга ёқмади, менга ёқмаганидан сўнг Имрон аканинг оиласига ҳам ёқмаган бўлса керак, менимча. Мабодо бу интервьюмиз билан кимнингдир дилини оғритиб қўйган бўлсам, кечирим сўраб қоламан», — дейди у.

Эслатиб ўтамиз, аввалроқ Дурдона Қурбонова Имроннинг тўйига нега бормаганини айтганди. Шунингдек, Имрон нега Дурдона Қурбоновани тўйига таклиф қилмагани ҳақида гапирганди. Шу билан бирга, Имрон Дурдона Қурбоновага видеомурожаат қилганининг сабабини айтгани ҳақида хабар берилганди.