Хонанда Улуғбек Раҳматуллаев ҳамда бастакор Фазлиддин Раҳмонов «Mashhurlar» кўрсатувига берган интервьюсида «Қирмизи олма» қўшиғининг ўғирлангани ҳақидаги саволга жавоб берди.

Бастакорнинг сўзларига кўра, Улуғбек Раҳматуллаев томонидан куйланган қўшиқ YouTube’га биринчи жойланган. Ундан кейин 15-16 та давлатдан қўшиқчилар бу қўшиқнинг коверини ижро этган. Шунингдек, Фазлиддин Раҳмонов уларнинг барчаси таронани рухсат олгандан кейин куйлаганини таъкидлади.

«Шу кунгача мухлислар қайси давлатда олгансиз деб чарчашмайди. Биз ҳам уларга жавоб беришдан чарчамаймиз. Биз ҳақиқатан биринчи бўлиб ижро этганимизни аниқлаш учун YouTube’га кириб, ‘Қирмизи олма’ ёзса шу кифоя қилади. Биринчи бўлиб Улуғбек Раҳматуллаев қўшиқни жойлаган. Кейин 15-16 давлат ижро этди. Ҳаммаси сўраб олинган. Илтимос қилган берганмиз», — дейди у.

Шу билан бирга, Улуғбек Раҳматуллаев унинг қўшиғини кимдир куйласа, хурсанд бўлишини айтди. Хонанда шу қўшиқ сабабли бир-неча дўстлар топганини таъкидлади. Унинг сўзларига кўра, ижодкорнинг қўшиқларини кимдир куйлаши бу санъаткорга нисбатан катта эътибор.

«Кимдир кимдирнинг қўшиғини куйласа хафа бўлади. Мен хафа бўлмайман. Хурсанд бўламан. Бу инсонга қувонч бахш этиши керак. Бу ижодкорга катта эътибор. Бир неча тилларда бу қўшиқ ковер сифатида куйланди. Шу қўшиқ орқали мен бир-неча дўстлар топдим», — дейди хонанда.

Эслатиб ўтамиз, аввалроқ Улуғбек Раҳматуллаев Нью-Йоркдаги ўзбекистонликлар уйида меҳмон бўлгани ҳақида хабар берилганди.