Актриса, педагог Дилдора Умарова «Omon-omon» кўрсатувига берган интервьюсида «Алпомиш» киносидаги илк роли ҳақида эслади.

Унинг сўзларига кўра, ушбу фильмдаги «Ойбарчин» образи унинг илк роли бўлган. Актриса бу ролни ҳали ўқишни тугатмасидан олдин ўйнаган. Кинога кастинг бўлган пайти у «Қалдирғоч» ролига чақирилган, лекин тақдир тақазоси билан «Ойбарчин» ролини ижро этган. Режиссёр Пўлат Файзиев Дилдора Умаровани кастингдан ўтказган ва шу ролга лойиқ кўрган.

«Ҳақиқатдан ҳам ҳозирги кунгача бу фильм актуал. Ҳали ҳам кўришади. Ҳозирги ёшлар кўришадими йўқми билмайман. Лекин менинг тенгдошларимдан кўпчилик кўрган. Фильмга 4 курсда таклиф қилишди. ‘Қалдирғоч’ ролига. Мен ‘Ойбарчин’га ўтаман деб ўйламаган эдим. Битта раққосани чақиришган эди ‘Ойбарчин’ ролига. Тақдир тақазоси билан, нимадир ўзгардими у раққосани олмайдиган бўлишди ва мени таклиф қилишди. Кастингда ҳам мен ‘Қалдирғоч’ни ўйнагандим. Кейин яна бошидан чақириб, мени ‘Ойбарчин’га текшириб кўришди. Кастингни режиссор Пўлат Файзиев олган. У мени шу ролга лойиқ кўрди. Жуда ҳам хурсанд бўлдим. Чунки бу ёш қиз учун, талаба учун бирдан бошига бахт тушиб қолиши, мен учун энг қувончли воқеа эди. Эпизоддан бошламадим. Бира тўла катта образда, яъни ‘Ойбарчин’дан, бошладим», — дейди Дилдора Умарова.