Актёр, сўз устаси Аваз Охун YouTube’даги «Intervyu Tv» лойиҳасига берган интервьюсида ҳокимга ҳазил қиламан деб уни хафа қилиб қўйганини айтиб берди.

Унинг сўзларига кўра, қизиқчи қайси ҳоким эканини айтмаган. Лекин, ўша вақтда байрам бўлгани, шундан сўнг улар бирга ўтирганини айтган. Бирга ўтирган вақтда ҳоким мақом куйлаган, ўша вақт Аваз Оҳун уни хафа қилиб қўйган.

«Кулдираман деб ҳокимни хафа қилиб қўйганман. Қайси туманнинг ҳокими эканини айтмайман. Байрам тугагандан кейин бирга ўтиргандик. У қўшиқ айтар экан. ‘Торимни олиб кел’, деди. Олиб келиб беришди. Соат кечаси 1:00 эди. Қўшиқ айтишни бошлади. Мақомнинг сўзини билмаган одам уни тушунмайди. Кеч бўлгани учун одамлар ухлаб ўтирибди. Менинг ҳам ‘кўзим кетиб қолдиʼ. Кейин кўзимни очиб ‘Ҳоким бува бунинг сўзи ҳам борми?ʼ дедим. Ўтирганларнинг ҳаммаси кулиб юборди. Ҳоким торини қўйди. Санъаткор бўлиб туриб, санъатни тушунмайсанми? Мен Навоийнинг ғазалини айтяпман деди. Ўша пайти ростан сўзини тушунмаганман. Кейин ҳокимнинг кайфиятини кўтараман деб 3:30 гача латифа айтганман», — дейди актёр.